घराचे दार

🚪🚪🚪🚪🚪🚪🚪🚪🚪🚪🚪

                * घराचं दार *

*घराला असतं एक वाट पाहणारं दार।*   

*आई बाबा नाव तयाचे समजदार।धृ।*

*दाराला आस्थेचे महिरपी तोरण*

*जणू आदरतिथ्याचे प्रेमळ किरण*

*एकमेव विसाव्याचे स्थान उबदार*

*घराला असतं एक वाट पाहणारं दार।१।*

*दारिद्र्याच्या दशवतारात न मोडणारे*

*कोत्या विचाराच्या वाळवीने न सडणारे*

*ऐश्वर्याच्या उन्मदात कधी न फुगणार*

*घराला असतं एक वाट पाहणारं दार।२।*

*नातवंडांच्या आगमनाला नेते तुकडापाणी।*

*करी लेकीची पाठवणी साश्रू नयनांनी।*

*व्यसनी पावलांना आणत ताळ्यावार*

*घराला असतं एक वाट पाहणारं दार।३।*

*ऊन पावसाचा मारा हे सोसत असतं*

*वाईट नजरांना सतत झेलत असतं*

*आदरयुक्त नजरेने उभं असतं धाकदार*

*घराला असतं एक वाट पाहणारं दार।४।*

*बाहेर जाताना आशिर्वाद हे देतं*

*उशीर झाला तर जाब पण विचारतं*

*साऱ्या कुटुंबाचं असतं हे राखणदार*

*घराला असतं एक वाट पाहणारं दार।५।*

 *तकलादू वाटलं तरी आडोसा असतं*

*चांगल्या-वाईटाच कानोसा घेत असतं*

*अडाणी असलं तरी करत मूल्यांच संस्कार*

*घराला असतं एक वाट पाहणारं दार।६।*

*आयुष्यात नेहमी जपा या कवाडाला*

*स्वार्थाचे खिळे ठोकू नका या दाराला*

*साऱ्या  सुख-दुःखाच आहे हे साक्षीदार*

*घराला असतं एक वाट पाहणारं दार।७।*

*जपू या आपण आई-बाबा या कवाडाला।*

*नमन माझे सदा या स्वर्गाच्या प्रवेशद्वाराला।*

श्री दादाभाऊ बाळासाहेब बेलोटे  जि. प. प्रा. शाळा कळस ता. पारनेर जि. अहमदनगर 

🚪🚪🚪🚪🚪🚪🚪🚪🚪🚪🚪